Tigers 
დღევანდელ ფოტო ნაკრებში თქვენ იხილავთ არა მარტო ამ ულამაზესი ცხოველების ფოტოებს, არამედ შესაძლებელია შეიტყოთ რაიმე ახალი მათ შესახებ…
ვეფხვი კატისებრთა ოჯახის ყველაზე დიდი წარმომადგენელია, წაგრძელებული სხეული მოხატული აქვს განივი ზოლებით.
გავრცელებულია ჩრდილოეთ კორეაში, ჩინეთში, ინდოეთში, ინდოჩინეთში, მალაის არქიპელაგზე, ჩრდილოეთ ირანში, უსურიისა და ამურის მხარეებში, თალიშში, ამუდარიის ხეობაში, იშვიათად თურქმენეთში, საქართველოში ვეფხვი არ ბინადრობს. ვეფხვი ნადირობს მსხვილ ძუძუმწოვრებზე, იშვიათად ფრინველებზე, ქვეწარმავლებზე და სხვა. თავს ესხმის ადამიანსაც.
ვეფხვი 2-3 წელიწადში ერთხელ შობს თვალაუხილავ, უსუსურ 2-4 ბოკვერს (მაკეობა 105 დღემდეა). ბოკვერებს 2 წლის ასაკიდან უკვე საკმაო ძალა აქვთ დამოუკიდებლად სანადიროდ.
ვეფხვი სქესობრივ სიმწიფეს აღწევს 4-5 წლის ასაკში, ცოცხლობს საშუალოდ 8-10 წელი. აქვს 6-7 მ სიგრძის ნახტომი. ქართულ ზეპირსიტყვიერებაში და ძვ. მწერლობაში სიტყვა "ვეფხვი” აღნიშნავდა ჯიქს (ლეოპარდს ანუ პანთერას), დღევანდელი გაგებით კი მხოლოდ XX საუკუნეში დამკვიდრდა.
ვეფხვები ლომებისგან განსხვავებით მარტოხელა ცხოველები არიან, რომლებიც ნიშნავენ თავიანთ ტერიტორიას და იცავენ მეზობლების თავდასხმისაგან.
რადგანაც ვეფხვები ძირითადად ნადირობენ შებინდებულზე ან გამთენიისას, მათი ზოლები ეხმარება მათ დაიმალონ მაღალი ბალახის ჩრდილში. დღის განმავლობაში ისინი ისვენებენ ბალახში ან იმალებიან ტყეში.
ვეფხვები თავს ესხმიან ფარულად, საფარიდან. როდესაც მსხვერპლი საკმაოდ მიუახლოვდება, მტაცებელი ანხორციელებს სასიკვდილო დარტყმას.
დიდი კატები მტაცებელი მხეცები არიან, ამიტომ ნადირობა მათი გადარჩენის ერთადერთი პირობაა. ისინი მსხვერპლს უმთავრესად უსაფრდებიან ან ეპარებიან, შემდეგ კი თავს ესხმიან. მას შემდეგ რაც კატა ნადავლს დაიჭერს, ყბაში იგდებს და ამტვრევს კისერს, ზოგიერთ შემთხვევაში კი ახრჩობს. დიდი კატების უმრავლესობა მარტო ნადირობს, გამონაკლისს ლომები წარმოადგენენ: ისინი ჯგუფებად ნადირობენ, ერთი ან ორი ლომი მისდევს არჩეულ მსხვერპლს და მოტყუებით მიყავს იმ ადგილამდე, სადაც ლომთა ჯგუფია ჩასაფრებული. ჯგუფური ნადირობა მეტად წარმატებული სტრატეგიაა.
|
